Sacramentarium Gregorianum

_________________________________________________________

47.

Feria iii ad sanctam Balbinam

Perfice quaesumus domine benignus in nobis obseruantiae sanctae subsidium, ut quae te auctore facienda cognouimus, te operante impleamus: per.

Super oblata. Sanctificationem tuam nobis domine his mysteriis placatus operare, quae nos et a terrenis purget uitiis et ad caelestia dona perducat: per.

Ad complendum. Ut sacris domine reddamur digni muneribus, fac nos tuis quaesumus oboedire mandatis: per.

Super populum. Propitiare domine supplicationibus nostris et animarum nostrarum medere langoribus, ut remissione percepta in tua semper benedictione laetemur: per.