BIBLIOTHECA AUGUSTANA

 

Leo XIII

1810 - 1903

 

Carmina

 

1891

 

Textus:

Vox Latina - Lateinisches Lesebuch, Band III

ed. O. Stange/P. Dittrich, Leipzig 1924.

Neulateinische Dichtung in Italien 1850 - 1950

ed. Vito R. Giustiniani, Tübingen 1979.

 

Ars photografica

De se ipso

Aenigma

Ultima desiderata

 

_________________________________________________________

 

 

 

Leo XIII photographicatur

 

 

Ars photographica

(1867)

 

Expressa solis spiculo

nitens imago, quam bene

frontis decus, vim luminum

refers et oris gratiam!

O mira virtus ingeni

novumque monstrum! Imaginem

naturae Apelles aemulus

non pulchriorem pingeret.

 

De se ipso

(1883)

 

Iustitiam colui; certamina longa, labores,

      ludibria, insidias, aspera quaeque tuli.

At fidei vindex non flectar: pro grege Christi

      dulce pati ipsoque in carcere dulce mori.

 

Aenigma

(18??)

 

Pars prior interdum velis ornatur et auro

      Altera pars prisco tempore nummus erat.

Uno iuncta simul verbo pars utraque gentem

      Rapto viventem belligeramque notat.

Pontificis magni lepidum ecce aenigma solutum:

      Tradere versiculis forsitan expediat.

Altera pars ara scilicet, pars altera bes est

      Verba velim iunges, prodierint Arabes.

 

Ultima desiderata

(1897)

 

Extremum radiat, pallenti obvolvitur umbra

      Iam iam sol moriens; nox subit atra, Leo,

Atra tibi, arescunt venae, nec vividus humor

      Perfluit, exhausto corpore vita fugit.

Mors telum fatale iacit; velamine amicta

      Funereo gelidus contegit ossa lapis.

Ast anima aufugiens excussis libera vinclis

      Continuo aetherias ardet anhela plagas;

Huc celerat cursum; longarum haec meta viarum;

      Expleat oh clemens anxia vota Deus!

Scilicet ut tandem superis de civibus unus

      Divino aeternum lumine et ore fruar.

Detur et ore tuo, caeli regina, beari,

      Quae dubiae errantem per salebrosa viae

Duxeris in patriam. Materno munere sospes

      Carmine te memori, virgo benigna, canam.