Weltchronik

Prolog

Verse 1 - 128

__________________________________________________________________________________

Got, aller ding ein überkraft,

gip mînem muot die meisterschaft,

alsô daz mîn zunge

von dîner barmunge

5

und ouch von dîner gotheit,

dâ nimmer ze end wirt von geseit,

sprech ein teil von dem sin,

wan ich ze kranc dar zuo bin.

wie sol ich mich des nemen an,

10

daz ich ze end niht bringen kan?

dâ von bit ich dich, herre got,

daz dû mich habest in dînem gebot.

wan ich weiz von der wârheit wol,

dâ von ich ez sagen sol,

15

daz aller griez und alliu loup

und swaz ie geflouc oder stoup,

wærn daz allez zungen gar,

die möhten niht in tûsent jâr

gar gesagen diu wunder,

20

diu got alliu besunder

mit sîner kraft beschaffen hât

an einer ieslîchen stat.

dâ von bin ich ein tumber man,

daz ich mich des wil nemen an

25

und ein teil wil dâ von sagen.

ich möht gerner stille dagen,

wan daz ich mich des trœsten sol,

daz got ist aller gnâden vol.

dâ von wil ich mich nemen an

30

des ich nie begunnen hân,

wan gotes genâd ist sô starc,

si hilfet baz dan tûsent marc.

wan swem got hilf mit teilen wil,

der hât immer êren vil:

35

er hilfet baz dann alz daz lebt.

ist ieman der dâ wider strebt,

er hât niht kristenlîchen sit,

dâ er sîn sêl behaltet mit.

Wil mir nû got bî gestân,

40

sô wil ich mich nemen an,

daz ich daz buoch wil slihten,

nâch mînem sinne rihten

ûf die genâd der gotheit,

dâ nimmer ze end wirt von geseit.

45

nâch der künclichen lêr wil ich

tihten und ouch rihten mich,

wie die heiden besunder

stiften manic wunder

verr in der heidenschaft -

50

si hêten liut michel kraft -

und waz si dâ begiengen;

si stiften unde viengen

beidiu stet unde lant:

wie daz stuont allez in irr hant.

55

ich wolt iu sagen mêre,

verdruzz iuch sîn niht sêre,

wie die künig ze Rôm sâzen

und ir trûrens vergâzen,

und wie si dar bequæmen

60

und ouch ir ent næmen,

wie ieslîcher besunder

stifte in Rôm wunder.

daz wolt ich gern bescheiden,

wie die kristen und die heiden

65

dâ gekrœnet giengen

und werdiclîch enpfiengen

den zins von den rîchen,

des mohtens niht entwîchen,

die fürsten muosten in zins geben.

70

dâ mohten si niht wider streben,

wan die Rœmære

lobt man dô âne swære,

wan si gewaltic wâren

bî den selben jâren:

75

[wan] ein ieglîch fürst muost gâhen

diu lant von in enpfâhen.

swer des selben niht entet,

der wart vertriben dâ ze stet.

des hêt er schaden unde schant,

80

swâ er fuor in dem lant.

des moht in nieman widerstân,

swer von Rôm niht wolt lêhen hân.

Der ditz getiht gemachet hât,

der sitzt ze Wienn in der stat

85

mit hûs und ist Johans genant.

an der korôniken er ez vant.

der Jansen enikel sô hiez er.

von dem buoch nam er die lêr.

sî ieman, dem ez missehag,

90

der mach ein bezzer sag,

daz wil ich lâzen âne zorn.

er sî edel oder ungeborn

oder swie er ist sô gestalt,

er sî junc oder alt,

95

dürr oder veist genuoc:

der dar zuo ist alsô kluoc,

daz dâ heizet tihten,

nâch dem wolt ich mich rihten

und lernen die gefuoc,

100

daz ich kund genuoc.

ir tihter über tiutschiu lant

oder swâ die tihter sîn bekant

von dem mer hinz an den Rîn,

die lâzen mich irn diener sîn,

105

wan ich in den gedenken bin,

daz ich die gefuog wil von in

lernen unde tihten;

der gefuog wolt ich mich rihten.

Ich wil die red nû lâzen sîn.

110

sî ieman der nû spotte mîn,

daz ich daz buoch getihtet hân,

der sî des tievels kappelân

und müez sîn der helle kint.

an den ougen werd er blint.

115

an handen, [an] füezen werd er lam,

an armen, [an] beinen alsam.

hab er iht, daz im sî liep,

daz müez im steln ein diep.

den liuten werd er widerzæm

120

und sînen mâgen ungenæm.

des helfe mir der süeze Krist,

der himel und erd gewaltic ist.

den fluoch wil ich lâzen stân

und wil daz buoch heben an.

125

ich wil iu allen tuon bekant,

wie got den êrsten menschen vant,

und wie ouch got der reine

beschuof die engel gemeine.