Buch der Natur

V. VON DEN KRÄUTERN

IN AINER GEMAIN.

___________________________________________________

21.

Von den pinzen.

Cirpus haizt ain pinz oder in anderr däutsch ain semd und wehset gern in pfüeln und an mosigen steten, dâ sê stênt. daz kraut hât gar ain grüen rinden und hât inwendig ain grôzen lôsen kern, den haizent die maister sein mark. wenn man daz mark oder den kern in gemischten wein legt, sô zeuht er daz wazzer an sich und schaidet den wein von dem wazzer. daz kraut ist der grôzen pinzen und wehst lang über sich auf ân all knoden und ist sein saf gar rôch und wäzzrig, und die selben art, die des krautes mark an im hât, die hât auch der slâten mark oder kern, daz ze latein carectum haizt, und wechst auch an wäzzrigen steten und haizt auch ze latein gladiolus, dar umb, daz ez ainem swert geleicht.