‹Antiphona:›

O virgo ecclesia,

plangendum est,

quod sevissimus lupus

filios tuos de latere tuo abstraxit.

O ve callido serpenti!

Sed o quam preciosus est sanguis salvatoris,

qui in vexillo regis

ecclesiam ipsi desponsavit.

Unde filios illius requirit.

‹Antiphona:›

Nunc gaudeant materna viscera

ecclesie,

quia in superna simphonia

filii eius

in sinum suum collocati sunt.

Unde, o turpissime serpens,

confusus es,

quoniam, quos tua estimatio

in visceribus suis habuit,

nunc fulgent in sanguine filii dei.

Et ideo laus tibi sit,

rex altissime.

Alleluia.

‹Antiphona:›

O orzchis ecclesia

armis divinis precincta

et iacincto ornata,

tu es caldemia stigmatum loifolum

et urbs scientiarum.

O, o, tu es etiam crizanta

in alto sono

et es chorzta gemma.

‹Antiphona:›

O choruscans lux stellarum,

o splendidissima specialis forma

regalium nuptiarum,

o fulgens gemma!

Tu es ornata in alta persona,

que non habet maculatam rugam.

Tu es etiam socia angelorum

et civis sanctorum.

Fuge, fuge speluncam antiqui perditoris

et veniens veni

in palatium regis.

Kyrie eleyson!

Christe eleyson!

Kyrie eleyson!