De diversis artibus libri III

Liber secundus

____________________________________________________________

Caput IV.

De commixtione cinerum et sabuli.

HIS ita compositis, accipe ligna faginea omnino in fumo exsiccata, et accende ignem copiosum in majori furno ex utraque parte. Deinde tollens duas partes cinerum de quibus supra diximus, et tertiam sabuli diligentur de terra et lapidibus purgati, quod de aqua tuleris, commisce in loco mundo. Cumque diu et bene commixta fuerint, levans cum trulla ferrea pone in minori parte furni super larem superiorem ut coquantur, et cum coeperint calefieri, statim eadem trulla move, ne forte liquefiant a calore ignis et conglomerentur, sicque facies per spatium unius noctis et diei.