Les contenances de table

Poème III

__________________________________________________

Enfant qui veult estre courtoys

Et a toutes gens agréable

Et principalement a table,

4

Garde ces rigles en francoys.

Enfant soit de copper soingneux

Ses ongles et oster l'ordure,

Car se l'ordure il y endure,

8

Quant ilz se grate y est roingneux.

Enfant d'honneur, lave tes mains

A ton lever, a ton disner,

Et puis au soupper sans finer,

12

Ce sont trois foys a tout le moins.

Enfant, dy benedicite

Et faiz le signe de la croix,

Ainsque tu prens riens, se m'en crois,

16

Qui te soit de nécessité

Enfant, quant tu seras aux places

Ou aucun prélat d'église est,

Laisse luy dire, s'il luy plaist,

20

Tant benedicite que grâces.

Enfant, se prélat ou seigneur

Te dit de son auctorité

Que dies benedicite

24

Fais le hardiement, c'est honneur.

Enfant, se tu es en maison

D'autrui, et le maistre te dit

Que tu sees, sans contredit

28

Faire le peulz selon raison.

Enfant, prens de regarder peine

Sur le siège ou tu te sierras,

Se aucune chose y verras

32

Qui soit deshonneste ou vilaine.

Enfant, quant tu seras assis

Pour ton corps refectionner,

Soit au soupper ou au disner,

36

Monstre toy prudent et rassiz.

Enfant, prens du vin et du pain

Ce qu'il souffist a ta nature,

Sans trop ne peu selon mesure,

40

Qui trop en prent est dit villain.

Enfant, tu ne te doibs charger

Tant de ta première viande,

Se plusieurs en as en commande,

44

Que d'autres ne puisses menger.

Enfant, se tu es bien scavant,

Ne mes pas ta main le premier

Au plat, mais laisse y toucher

48

Le maistre de l'hostel avant.

Enfant, garde que le morseau

Que tu auras mis en ta bouche

Par une fois, jamais n'atouche,

52

Ne soit remis en ton vaisseau.

Enfant, ayes en toy remors

De t'en garder, se y a failly,

Et ne présentes a nulluy

56

Le morseau que tu auras mors.

Enfant, garde toy de maschier

En ta bouche pain ou viande,

Oultre que ton cuer ne demande

60

Et puis après le recrascher.

Enfant, tu doibs prendre du sel

Dessus ton taillour, et saloir

Ta viande pour mieulx valoir,

64

Ou dedans ung autre vaissel.

Enfant, garde qu'en la salière

Tu ne mettes point tes morseaulx

Pour les saler, ou tu deffaux,

68

Car c'est deshonneste manière.

Enfant, se tu bois de fort vin,

Metts y eaue attrempeement

Et n'en boy que souffisamment

72

Ou il te troublera l'engin.

Enfant, se tu es ung yvrongne

Par trop boire, il est deshonneste,

Et en auras mal a la teste,

76

Et puis après honte et vergongne.

Enfant, garde que sur ton boire

Tu n'abondes trop en parolle,

Car la manière en est moult folle,

80

Enfant de bien ne le doit faire.

Enfant, a tablé je t'ordonne

Sur tout que point tu ne sommeilles,

Et aussi que tu ne conseilles

84

En l'oreille d'autre personne,

Enfant, jamais la bouche pleine,

Tu ne dois a autruy parler,

Ne boire aussy pour avaler,

88

Car c'est chose par trop vileine.

Enfant, garde, se tu es saige,

En quelque bancquet que tu voyses

Soit de seigneurs ou de bourgeoyses,

92

De trop habonder en langaige.

Enfant, soyes tousjours paisible,

Doulx, courtois, bening, amiable

Entre ceulx qui sierront a table

96

Et te gardes d'estre noysible.

Enfant, ce te est chose honteuse,

Se tu as serviette ou drap,

De boire dedens ton hanap,

100

Ayant la bouche orde et baveuse.

Enfant, se tu faiz en ton verre

Souppes de vin aucunement,

Boy tout le vin entièrement,

104

Ou autrement legecte a terre.

Enfant, garde de présenter

A ton hoste pain ne viande.

Prendre en peut sans qu'on luy commande

108

Autre ne l'en peut exempter.

Enfant, soies plain et joyeux,

En tout ce que tu fais ou dis,

Ne te habandonne a nulz vains dis,

112

Tu n'en pourras valoir que mieulx.

Enfant, se aucun serviteur oste

Aucun plat qui soit devant toy,

N'en fais semblant, tais t'en tout quoy,

116

Il souffist puis qu'il plaist a l'hoste.

Enfant, garde toy de remplir

Ton ventre si habundamment,

Que tu ne puisses saigement

120

Tes bonnes oeuvres acomplir.

Enfant, se tu veulx en ta pence

Trop excessivement bouter,

Tu seras constraint a rupter

124

Et perdre toute contenance.

Enfant, se tu es saige, escoute

De la table les assistans,

Sans parler fors qu'a l'heure et temps,

128

Et ne te tiens pas sur le coubte.

Enfant, se ton nez est morveux,

Ne le touche de la main nue,

De quoy ta vïande est tenue ;

132

Le fait est vilain et honteux.

Enfant, en quelque compaignye

Que soyes, ne veulles nifler

Ton nez, ne faire hault siffler ;

136

C'est déshonneur et mocquerie.

Enfant, metz ces dis en entente

Et les retiens en ton couraige.

Le résidu de ton potaige

140

Jamais a autruy ne présente.

Enfant, garde toy de frotter

Enssamble tes mains, ne tes bras

Ne a la nappe, ne aux draps;

144

A table on ne se doit grater.

Enfant, après que tu as prins

Des biens de ton hoste ou hostesse,

Remercie lez de leur largesse ;

148

Tu n'en pourras estre reprins.

Ballade

Enfant, oultre quoy que tu faces

Après ton mengier et ton boire,

Souviengne toy de dire grâces,

152

Tu es obleigé de ce faire.

Et remercie Dieu le père

Qui des biens t'a donné assez,

Et pour toutes oeuvres parfaire,

156

Prie Dieu pour les trespassez.

L'enfant saige tenu sera,

En toute bonne compaignye,

Qui bien ses reigles gardera,

160

Sans avoir honte ou villonnye.

Qui les tiendra, je vous affye,

Dedens son cuer bien enchâssez,

Honneur aura, mais qu'il n'oublie

164

Prier Dieu pour les trespassez.

Enfant, tu te doibs recoler.

Après qu'auras beu et mengié

Et ains que t'en vuelles aler,

168

Pour ceulx qui ont les biens gaingné,

Et te souvenir en pitié

Que de ce monde sont passez,

Ainsi que tu es obleigez

172

Prier Dieu pour les trespassez.

Prince enfant, tu es tenu

Des biens qui te sont amassez,

Dont ton estat est soustenu,

176

Prier Dieu pour les trespassez.