Buch der Natur

V. VON DEN KRÄUTERN

IN AINER GEMAIN.

___________________________________________________

7.

Von dem anys.

Anisium haizt aneis und haizt auch rœmischer venichl, wan daz kraut hât pleter sam der venichl, ân daz si ain klain praiter sint, und daz kraut hât sâmen, der haizet auch aneis. daz aneis ist an der kraft haiz und trucken und haizt man ez auch süezen kümel und hât die kraft, daz ez entsleuzt und verzert und ist gar guot für die wint in dem leib und wider daz unkochen in dem magen und ist gar guot wider den ôrnsiehtum, der von fäuht kümt. ez mêrt auch der frawen milich in den prüstlein und pringt daz harmwazzer vast und den frawen ir gewonhait oder ir haimlichait und rainigt die muoter von dem weizen fluz, aber ez locket zuo unkäusch, ez zeuht den leip zuo und öffent der niern verschoppen und treibt vergift auz.