Buch der Natur

V. VON DEN KRÄUTERN

IN AINER GEMAIN.

___________________________________________________

6.

Von dem verbkraut.

Alterana haizt verbkraut dar umb, daz ez des menschen leip verbt. daz kraut ist an der kraft kalt und trucken und wenn sich ain mensch vor gewaschen hât in dem pad und sich salbet mit dem kraut und beweschet sich dar nâch mit warm wazzer und an dem andern tag auch und tuot daz alsô oft, daz rainigt den leip gar schôn und macht in auz der mâzen weiz. aber an dem êrsten tag scheinent diu gesalbten glider gar ungestalt, an dem andern tag niht sô ungestalt und an dem dritten allerminst und an dem vierden gar lieht und lauter. daz kraut ist gar guot zuo wunden ze hailen und dar zuo ist auch cinamomespulver guot, hâst dû kainen andern.