Buch der Natur

V. VON DEN KRÄUTERN

IN AINER GEMAIN.

___________________________________________________

17.

Von dem zwival.

Cepe haizt ain zwival oder ain zwibol. der hât die art, daz er vast öffent die gäng in diu gelider und in dem leib und plæt und zeuht daz pluot auz under die haut, dar umb macht er die haut rôt und pringt ain guot varb. wenn er niht gesoten ist oder gerœstet, sô hât er klain narung, aber sô er gekocht ist pei dem feur, sô pringet er ain grôz dick fäuht, diu etwaz nert, iedoch macht er pœs pluot und fäuht in dem leib, dar umb ist er der vernunft und dem sinn schad. er sterkt den magen und pringt ainen lust ze ezzen. er öffent die afternâdern, die ze latein emoroides haizent, und erwegt die unkäusch. sein wazzer ist guot für der töbigen hunde piz, wenn man die wunden dâ mit salbet oder der ain pflaster dar auz macht und ez über pindet.