Buch der Natur

V. VON DEN KRÄUTERN

IN AINER GEMAIN.

___________________________________________________

35.

Von dem weizen senif.

Eruca haizt weizer senif. daz ist ain kraut, daz hât pleter nâhent sam der reht senif und ist haiz und trucken mæzicleichen und dar umb pflanzt man ez in die gärten. wenn man daz kraut mischt zuo piezen oder zuo mangolt, sô sänftigt ez der piezen kelten und ir fäuht. daz kraut ist zwairlai. daz ain ist wild und daz ander haimisch. des haimischen sâm kocht man an senifes stat; izt aber man daz kraut ain, sô beswært ez daz haupt, und den schaden benimt man im dâ mit, daz man ez mischt mit lactukenkraut oder mit piezen. daz kraut ist den ammen guot, wan ez pringt in vil milich und hilft daz ezzen kochen in dem magen. aber daz wilde pringt daz harmwazzer und erweckt die unkäusch, wan ez sterkt den wünschelstab und daz würkt allermaist des krautes sâm.