Buch der Natur

V. VON DEN KRÄUTERN

IN AINER GEMAIN.

___________________________________________________

53.

Von dem kressen.

Nasturtium haizt kress. daz ist ain gemainez kraut und ist an der kraft haiz und trucken und derret die faulen fäuht in lærem leib und behelt daz auzvallend hâr. wenn man ez in trank nimt und sich dâ mit salbet, sô ist ez guot zuo den apostemen und zuo den gesweren. sô man ez mischet mit salz und mit honig, sô ist ez guot für den nagenden siehtum, der ze latein ignis persicus haizt und haizent in etleich laien daz hellisch feur, und ist guot für die gemaineu waichung der âder und rainigt die lungel und ist nütz für des âtem gepresten, wer den niht wol gehaben mag von dem siehtum, der asma haizt. er erhitzt auch den magen und die lebern und ist guot für des milzes diezen und für sein plæn. idoch ist er dem magen etswie vil schad. daz kraut mêrt auch die unkäusch und mêrt der frawen haimleichait, diu menstrua haizt, und wirft die gepurt auz der muoter. aber stœzt man ez niht und zereibt ez, sô behelt ez si. ez ist auch für der vergiften tier hecken guot und hât vil anderr kreft, wenn man ez reht und wol beraitet.