Buch der Natur

V. VON DEN KRÄUTERN

IN AINER GEMAIN.

___________________________________________________

1.

Von dem wermut.

Absinthium haizet wermuot. daz ist gar ain pitter kraut und ist menschleicher art gar nütz und gemachsam, alsô spricht Platearius und ander grôz maister. wer des krauts saf trinket, daz ist für mangerlai guot, er trink ez mit wein gemischt oder ungemischt. ez ist guot für die würm in dem leib und für daz verschoppen der lebern und des milzes und für des hauptes siehtum, der von pœsem dunst und von pœsem dampf kümt. ez ist auch für den vallenden siehtum guot, der ze latein apoplexia haizt, wenn man fürht, daz der komen well, und ist gar ain guot erznei dem, der die sprâch verlorn hât. wer ôrwürm in den ôrn hab, der traufe des safes dar ein. wer daz saf trinket, dem macht ez daz gesiht klâr. ez beschirmet auch püecher, gewant und holz vil jâr vor würmen und vor mäusen und ist gar guot dem magen, wan den sterket ez, und sterket des ezzens kochen in dem magen. wenn man wermuot mit öl rœst und salbet der menschen leib dâ mit, die behüett si vor den flœhen; und welher schreibær sein tinten dâ mit seudet, waz püecher oder prief er dâ mit schreibt, diu nagent die mäus niht. etleich tuont auch wermuot in ir laugen für die milben. ez ist auch ain wunder, daz diu wermuot zwuo aigenchait an ir hât, die sint widerwärtig an ainander. si hât die art, daz si entsleuzt und waicht den menschen, der des bedarf, und hât auch die art, daz si zesamen zeuht und streng macht, aber den, der des bedarf. die andern art hât si von der grobhait ires saffes und die êrsten hât si von irr hitz und von irr pitterkait, wan wermuot ist haiz in dem êrsten grâd und trucken in dem andern.