Buch der Natur

V. VON DEN KRÄUTERN

IN AINER GEMAIN.

___________________________________________________

45.

Von der ispen.

Isopus haizt isp. daz kraut ist haiz und trucken, sam Platearius spricht, und ist nütz mit den pletern und mit den pluomen, aber mit der wurz niht. wer des krauts saf seudet und daz antlütz dâ mit bestreicht, daz pringt im guoten smack. wenn man ispen kocht mit honig, daz ist der lungel guot. wer ispen mit veigen seudet und daz wazzer in diu ôrn treuft, daz benimt der ôrn smerzen. und genuog ander tugent hât si an ir, wenn man si beraitet, als man lêrt in der ärzt kunst und in iren püechern.